LH3

Iturzaeta Chef jatetxea

Eta azkenean hiruhileko osoan ikasitakoa praktikan jartzeko aukera izan dugu! Menua pentsatu, gela jatetxe bihurtu, apaindu, menuak idatzi, bakoitzak zer ekarri erabaki, etxean janaria prestatu, praktikatu… zenbat gauza hartu behar diren kontuan!

Bi txandatan antolatu gara: goizeko taldean LHko anaia-arreba eta lehengusuak izan ditugu gonbidatu; arratsaldekoan berriz, DBHkoak eta tutore izan ditugun irakasleak. Batzuk chefak, beste batzuk zerbitzariak, lana ondo banatu eta ahalik eta zerbitzu onena ematen saiatu gara; lehen mailako jatetxea gara!

Hemen dituzue argazki eta bideo labur batzuk. Gozatu ikusten guk lanean beste.

GOIZEKOA

ARRATSALDEKOA

 

LH3

Getariako ereserkia

Talde batek aukeratutako abestia igotzea falta zitzaigun; asko pentsatu ondoren hauxe izatea erabaki zuten: Getariako ereserkia.

Gelan kantatu, etxean kantatu, ikasi… ederki abesten dugu!

Herriko musika bandaren grabazioa aurrez bazegoen, eta orain bi urte Salbatore abesbatzari eskatu genion kantatzeko eta grabatu egin genien.  Herriko taldeek egindako bertsioak ere badira. Hemen dituzue guztiak; gozatu!

Abesbatza

Banda

Ihes

Intzak hik  

 

 

LH3

Garate Gainean ezkurrak biltzen

Garate Gaina Getariako parajerik ederrenetakoa dela zalantzarik ez dago; hango bistak eta lasaitasunak ez dute parerik.

Guk Garate Gaineko artelatz basora egin dugu irteera, herritar askok oraindik ezagutzen ez duten  leku zoragarri batera. Mahastietan barrena Garate Gainera igo eta, hamaiketakoa egin ondoren,  haritz, ametz eta batez ere artelatzez beteriko baso miragarrian barneratu gara.  Gipuzkoako Zuhaitz izendapen berezia duen artelatz harrigarria ikusi ondoren artelatz edo arkamuka ezkurrak bildu ditugu gero landatu eta kimu berriak sor daitezen. Bukatzeko, Eskolarako bueltako bidea hartu aurretik,  basoko animaliek ura edaten duten eta bizitzaz beterik dagoen urmaeletara jo dugu.

ARGAZKIAK

LH3

Txoko jatetxera bisita

Getariako arrantzaleek itsasoan arraina erretzeko erabiltzen zituzten oalletatik hasi, arrai-partea herriko sagardotegietan prestatzeko parrilla txikietatik barrena lehenengo erretegietara eta haietatik gaur egungo jatetxeetako parrilletara… ibilbidea ederki azaldu digu Txokoko Maialenek gaur egin diogun bisitan. 

Lehenago aitak eta aitonak bezala, eguneko arraina eskaintzen diote bezeroari Txokon, eta guri gaur horixe dastatzeko aukera eman digute. Non eta nola prestatzen duten ikusi eta gero jan, ederra benetan! Gainera, gure zalantza eta galdera guztiei erantzun diete.

Gero eta gehiago dakigu gure jatetxeetaz; gaur, nondik datozen ikasi dugu: arrantzaleek arrainaz gain arraina prestatzeko modu bat ere utzi digute, gure herriko bereizgarria dena, altxorra.

Eskerrik asko, Maialen, eskerrik asko Manu, eskerrik asko Txoko!

 

LH3

Giroara bisita

Jatetxeak proiektuaren barruan, gaur Giroara joan gara bisitan. Aurretik galderak prestatuta eraman ditugu eta Arantxak eta Axutek pazientzia handiz argitu dizkigute zalantza guztiak, hamaiketako ederra egiten genuen bitartean. Ondoren, sukaldea, jangela, bodega, barra… ikusteko aukera izan dugu. Eskerrik asko guztiagatik!

 

 

LH3

Jatetxeak

Jatetxeak proiektuarekin buru-belarri gabiltza: jatetxeetako menuak aztertu, gure ametsetako jatetxea diseinatu, aurkezpenak egin, taldeka lehenengo eta banaka gero, jatetxea antolatu gelan… ez daukagu aspertzeko denborarik! Hemen ateratako argazki batzuk.  

      

LH3

Partxis txapelketa

Aste osoan etxean entrenatzen ibili eta gero, ostiralean Iturzaetako I. Partxis Txapelketa jokatu genuen. Bukatu dira oporrak, landu garuna, laguna! Pentsatu, kontatu, poztu, galtzen hasi eta irabazi, ia-ia irabazi baina galdu… Beti ezin baita irabazi!

Jarraitu etxean mahai jolasetan, partxisean, karta-jokoan… edo dena delakoan, jolastu/ikasi elkarrekin!