Azkeneko egunean puntu txapelketa egin dugu gelan. Bi partida irabazten zituena izan da talde bakoitzeko garailea. Irabazleek bonboi bana jaso dute eta jarraian denok txistor bokadiloa jan dugu. Gainera, euriak tarte batean atsedena eman digula aprobetxatuta, Eguneo Zentrora joan gara Gabon abestiak kantatzera; haiek pozik eta gu ere bai!
Oporrak ditugu orain, gozatu, eta urtarrilaren 8an elkartuko gara berriz Eskolan!
URTE BERRI ON GUZTIOI!
Azaroa bukaeran bildu genituen ezkurrak jasotzera etorri da Garate Gaineko artelatz basoa berreskuratzeko proiektuaren bultzatzaile izan den Juanjo Perez. Ezkurrak Gipuzkoako Foru Aldundiak duen biltegira eramango ditu eta landatzean bueltatu egingo dizkigu guk zaintzeko. Artelatz, arkamuka edo quercus suber zuhaixkak 2025eko udaberrian landatuko ditugu Garate Gainean. Herriko ondarearen zaintzan partaide izateaz harro gaude!
Eta azkenean hiruhileko osoan ikasitakoa praktikan jartzeko aukera izan dugu! Menua pentsatu, gela jatetxe bihurtu, apaindu, menuak idatzi, bakoitzak zer ekarri erabaki, etxean janaria prestatu, praktikatu… zenbat gauza hartu behar diren kontuan!
Bi txandatan antolatu gara: goizeko taldean LHko anaia-arreba eta lehengusuak izan ditugu gonbidatu; arratsaldekoan berriz, DBHkoak eta tutore izan ditugun irakasleak. Batzuk chefak, beste batzuk zerbitzariak, lana ondo banatu eta ahalik eta zerbitzu onena ematen saiatu gara; lehen mailako jatetxea gara!
Hemen dituzue argazki eta bideo labur batzuk. Gozatu ikusten guk lanean beste.
Indarkeria matxistaren aurkako bertsoak ikasi ditugu; azaroaren 25ean landutakoa egunero gogoan dugulako.
Astero bertso/abesti bana buruz ikastea dugu erronka. Ea gustatzen zaizkizuen!
Talde batek aukeratutako abestia igotzea falta zitzaigun; asko pentsatu ondoren hauxe izatea erabaki zuten: Getariako ereserkia.
Gelan kantatu, etxean kantatu, ikasi… ederki abesten dugu!
Herriko musika bandaren grabazioa aurrez bazegoen, eta orain bi urte Salbatore abesbatzari eskatu genion kantatzeko eta grabatu egin genien. Herriko taldeek egindako bertsioak ere badira. Hemen dituzue guztiak; gozatu!
Intzak hik
Garate Gaina Getariako parajerik ederrenetakoa dela zalantzarik ez dago; hango bistak eta lasaitasunak ez dute parerik.
Guk Garate Gaineko artelatz basora egin dugu irteera, herritar askok oraindik ezagutzen ez duten leku zoragarri batera. Mahastietan barrena Garate Gainera igo eta, hamaiketakoa egin ondoren, haritz, ametz eta batez ere artelatzez beteriko baso miragarrian barneratu gara. Gipuzkoako Zuhaitz izendapen berezia duen artelatz harrigarria ikusi ondoren artelatz edo arkamuka ezkurrak bildu ditugu gero landatu eta kimu berriak sor daitezen. Bukatzeko, Eskolarako bueltako bidea hartu aurretik, basoko animaliek ura edaten duten eta bizitzaz beterik dagoen urmaeletara jo dugu.
Getariako arrantzaleek itsasoan arraina erretzeko erabiltzen zituzten oalletatik hasi, arrai-partea herriko sagardotegietan prestatzeko parrilla txikietatik barrena lehenengo erretegietara eta haietatik gaur egungo jatetxeetako parrilletara… ibilbidea ederki azaldu digu Txokoko Maialenek gaur egin diogun bisitan.
Lehenago aitak eta aitonak bezala, eguneko arraina eskaintzen diote bezeroari Txokon, eta guri gaur horixe dastatzeko aukera eman digute. Non eta nola prestatzen duten ikusi eta gero jan, ederra benetan! Gainera, gure zalantza eta galdera guztiei erantzun diete.
Gero eta gehiago dakigu gure jatetxeetaz; gaur, nondik datozen ikasi dugu: arrantzaleek arrainaz gain arraina prestatzeko modu bat ere utzi digute, gure herriko bereizgarria dena, altxorra.
Eskerrik asko, Maialen, eskerrik asko Manu, eskerrik asko Txoko!
Jatetxeak proiektuaren barruan, gaur Giroara joan gara bisitan. Aurretik galderak prestatuta eraman ditugu eta Arantxak eta Axutek pazientzia handiz argitu dizkigute zalantza guztiak, hamaiketako ederra egiten genuen bitartean. Ondoren, sukaldea, jangela, bodega, barra… ikusteko aukera izan dugu. Eskerrik asko guztiagatik!
Jatetxeak proiektuarekin buru-belarri gabiltza: jatetxeetako menuak aztertu, gure ametsetako jatetxea diseinatu, aurkezpenak egin, taldeka lehenengo eta banaka gero, jatetxea antolatu gelan… ez daukagu aspertzeko denborarik! Hemen ateratako argazki batzuk.
Badatoz, badatoz gau beltza eta arimen eguna! Dantza eta kanta ospatuko ditugu!
