Arratsalde on!

Uda badatorrelaaaaaaa!

Festa ederra izan dugu gaurkoan Eskolan. Ikusi nahi?

Iepa familia!

Gaur, HHko 3, 4 eta 5 urteko ikasleekin Oriora joan gara, ikasturteari amaiera emateko antolatutako azken irteeran. Eguraldia lagun izan dugu eta eguna zoragarri joan da: ilusioa, barreak, jolasak eta momentu politak izan dira nagusi.

Goizean autobusez abiatu gara, haurrak emozioz beterik. Oriora iritsi bezain laster ahateak, antzarrak, oiloak….bisitatu eta  hondartzara gerturatu gara, eta han, talde txikitan, jolasak eta ekintza desberdinak egin ditugu. Haurrek harea ukitu, gazteluak eraiki . karakolak bilatu eta itsasoaren soinua entzun dute, beti hezitzaileon zaintzapean.

Bazkaltzeko ordua iritsi denean, zelaian bildu gara denok elkarrekin bazkaltzeko. Bazkalostean, atseden apur bat hartu eta berriro ere jolasean aritu dira haurrek, askatasunez eta laguntasunez.

Eguna bukatzean, haurrek nekatuta baina poz-pozik itzuli dira autobusera. Aurpegietan irribarrea eta bihotzean oroitzapen eder bat zeramaten.

Ingurune naturalean elkarbizitza eta jolasa sustatzea, talde kohesioa eta laguntasuna indartzea, autonomiarako urrats berriak ematea esparru ezberdin batean eta esperientzia positiboak eskaintzea ikasturtea amaitzeko izan dira gure helbruak.

Egun zoragarri honen ostean, argi dugu: haurrak zoriontsu izan daitezen, batzuetan nahikoa izaten dela hondartza, lagunak eta eguraldi ona.

 

Iepa, Joxepa!

Badira egun batzuk tximeletak jaio direla gure geletan. Azkenean! Liburuek kontatu bezala arrautzetatik jaio ziren beldar nimiñoak tximeleta bihurtu dira! 

Idea asko genituen buruan; Handiak izango dira!; Kolore askotarikoak! Alejandra tximeleta bezain handiak! ….baina azkenean ikusi dugu gure usteak erdi ustel izan direla! Txuriak eta nahiko txikiak dira. Ez dute espirotronparik. Ez dute jaten. Emeak eta arrak elkartu ondoren emeek arrautzak ipintzen dituzte eta gero hil egiten dira.  Arrautza hauek gorde egingo ditugu eta datorren udaberrian ikusiko dugu zer gertatzen den.

 

Zetarren bidaia interesgarria iruditu zaigu. Ea zuei zer iruditzen zaizuen.

ZETARREN BIDAIA

Kaixo familia!

Zer moduz doaz oporrak?

Udaberriko oporrak hartu aurretik laguntxo berri batzuk izan genituen gelan. Iaz gure gelan egon ziren lagunek tximeletak izan zituzten gelan. Hauek arrautzak ipini zituzten eta andereñoak gorde egin zituen. Aurten gelara ekarri dituenean honako galdera egin du: Zer uste duzue jaioko direla arrautzetatik? eta erantzuna hauxe izan izan da: Tximeletak!! Arrautzetatik ordea, ez dira tximeletak jaio, beldar nimiño batzuk baizik. Badakigu Masustaondoko hostoak jaten dituztela eta eskola aurreko parkera joan gara beldarrentzat hosto bila. Opor egunetan etxean jarraitu dugu beldarrak elikatzen eta dagoeneko ez dira hain nimiñoak. Zer gertatuko ote da orain?

 

 

Kaixo familia:

 

Gaur 3 urteko ikasleok mollara irteera egin dugu! Poliki-poliki eskolatik abiatu gara moilaruntz   eta egia esan, nahiko nekatu bueltatu gara … baina merezi izan du!

Lehenengo geldialdia arraindegian egin dugu. Han bisiguak, antxoak, berdelak, bullak,  langostak… ikusi ditugu gertutik. Itsasoko animaliak gertutik ikusi ditugu!

Gero sare konpontzaileekin  egon gara, sareak konpontzen ikusten. Gu ere saiatu gara sareak konpontzen!  A zer lan fina egiten duten! Azkenik, bapore batetik sareak jasotzen ikusi ditugu, baina gaur ez dute arrainik harrapatu… Hala ere, esperientzia zoragarria izan da!

Irteera honekin proiektuari amaiera eman diogu, eta orain… udaberriko oporrak iritsi dira! Atseden pixka bat hartzeko unea da.

Ondo pasa eta laster arte!

Kaixo familia!

“Itsas izarretik Acuariumera” proiektua amaitzen gaude! 🌊⭐

 Azken hilabetean lan bikaina egin dugu “Itsas izarretik Acuariumera” proiektuarekin. Itsasoko bizitzari buruz ikertu, marraztu, istorioak sortu eta esperientzia aberasgarri asko bizi izan ditugu elkarrekin.

Orain, proiektuari amaiera polita emateko, bideo berezi bat prestatu dugu gure  ahotsak protagonista direlarik. Bertan, gure ikaskuntzak eta bizipenak entzuteko aukera izango duzue — itsas izarretik hasi eta Donostiako Aquariumera egin dugun bidaia txiki honi errepasoa eginez. 🐠🐚

Gonbidatuta zaudete bideoa ikustera!

 

Klika! klika!

 

Klika berriz!

Kaixo familia!

Gaur egun berezia izan dugu eskolan! 3 urteko gelako ikasleok, 4 eta 5 urtekoekin batera Acuariumera joan gara itsasoko animaliak gertutik ezagutzeko. Goizean, autobusean igo gara emozioz beteta, eta Donostiara iristean, abentura hasi da!

Acuariumen itsasoko animalia asko ikusi ditugu: arrain koloretsuak, marrazoak, manta arrainak… Bakoitzak txartel bat  eraman dugu soinean, eta bertan agertzen zen animalia aurkitzen saiatu gara. Ia denak topatu ditugu, baina batzuk ez… Adibidez, benetako balearik ez dugu  ikusi,  baina bere hezurrak bai!

Edurne itsas zaldiak  ikusteko irrikitan zegoen, eta zorionez, horiek topatu ditugu! Eskolan lantzen ari garen  itsas izarrak ere ikusi ditugu. Horietako bati bi beso falta zitzaizkion… Zer gertatu ote zaio? Eta orain zer gertatuko zaio? Galdera asko sortu zaizkigu!

Acuariumeko bisita amaitzean, Zarauzko Salbide parkera joan gara bazkaltzera eta ondoren elkarrekin jolasten primeran pasatu dugu. Arratsaldean, nekatuta, baina oso pozik  bueltatu gara eskolara.

Egun ahaztezina izan da! Non izango da gure hurrengo abentura?

 

 

Egun on, familia!

Gaurko egunean itsasoko animaliak izoztuta topatu ditugu. Nola sartu dira? Nola irtengo dira?

Esperimentatuz, sentsazioak biziz, bakarrik eta elkarrekin ondo pasa dugu!

Familia agurgarriak,

Datozen asteetan, gure 3 urteko geletan itsas munduari buruzko proiektu zirraragarri batean murgilduta ibiliko gara. Gure lagun batek itsas izar lehortu batzuk ekarri zituenean hasi zen dena. Galdera handi bat sortu zen gelan: Uretan jarriz gero, berpiztuko al dira?

Haurren jakin-minetik abiatuta, itsasoaren misterioa esploratuko dugu: itsas izarrak eta beste itsas animaliak nola bizi diren ikasiko dugu, haien bizilekuak ezagutuko ditugu eta jarduera berezi bat ere  prestatuko dugu… Donostiako Aquariumera irteera!

 

Dagoeneko etxetik materiala jasotzen ari gara. Mila-mila esker!