GAUR EGUN BEREZIA IZAN DUGU HAUR HEZKUNTZAKO 4 URTEKO GELAN: GETARIKO SOROSLEAK EZAGUTZERA JOAN GARA! GOIZEAN, DENA ONDO PRESTATU OSTEAN, HERRIRANTZ ABIATU GARA ILUSIOZ BETERIK.

HAMAIKETAKO EGITEKO GELDIALDITXOA EGIN DUGU, INDARRAK HARTZEKO, ETA ONDOREN DANTZAN ARITU GARA, PRIMERAN PASATU DUGU!

HAMAIKETAKO GOXOA JAN OSTEAN, HONDARTZAKO SOROSLEENGANA GERTURATU GARA.

BISITA BENETAN INTERESGARRIA IZAN DA. HAINBAT GAUZA IKASI DITUGU, ETA HEMEN DITUZUE GARRANTZITSUENETAKO BATZUK:

• HONDARTZAN GALTZEN BAGARA, SOROSLEEN POSTURA EDO SOROSLEENGANA JO BEHAR DUGU LAGUNTZA ESKATZEKO 🚨​

• ARRISKUTSUENETAKO BAT KARABELA PORTUGESA DA. ITSASOAN EDO HONDARTZAN IKUSIZ GERO, EZ GARA HURBILDU BEHAR ETA BEREHALA SOROSLEEI ABISUA EMAN BEHAR DIEGU. PIKATZEN BADIGU, EZ DA UR GEZA DUEN DUTXAN SARTU BEHAR, EZ BAITA ONA.

• SALBERAK ERE PIKATZEN DUTE. PIKATZEN BAGAITUZTE, BEROA JARRI BEHAR DA PIKADURA TOKIAN. ADIBIDEZ, HANPAN PIKATZEN BADIGU, OINUTSIK IBILI GAITEZKE LUR BEROAN, MIN HORI ARINTZEKO.

EGUN ZORAGARRIA ETA ABERASGARRIA IZAN DA. ESKERRIK ASKO GETARIKO SOROSLEEI HARRERA BIKAINAGATIK ETA EMANDAKO AZALPENENGATIK!

ZE EMOZIOA BIZI IZAN DUGUN ASTE HASIERA HONETAN GELAN! LEHENIK, GURE BELDARREN ARRAUTZAK IZAN GENITUEN, ETA GUSTURA-GUSTURA IBILI GINEN EGUNERO BEHATZEN. ARRAUTZETATIK BELDARRAK ATERA ZIREN, ETA BAKOITZA BERE ERRITMOAN HAZTEN JOAN ZEN, AZKENEAN KRISALIDA BIHURTU ARTE.

ASTEBURUAN, ETXEAN GEUNDEN BITARTEAN, MAGIA GERTATU DA… ETA ASTELEHENEAN IKUSI DUGU GURE LEHEN HIRU TXIMELETAK JAIO DIRELA! 🥳 ZE POZA HARTU DUGUN!

EDERRAK DIRA ETA BENETAN INTERESGARRIA IZAN DA BERAIEK BIZITAKO BIZITZA-ZIKLOA GERTUTIK IKUSTEA.

BAINA, ALDI BEREAN, UNE TRISTE SAMARRA ERE BIZI IZAN DUGU: GURE ZAPABURUETAKO BAT HIL EGIN DA, BUZTANTXO. NATURAREN PARTE DA HORI ERE. JAIO, BIZI ETA HIL… BIZITZAREN ZIKLOA GERTUTIK EZAGUTZEN ARI GARA.

 

BELDARRAK BIDEOA

JOAN DEN OSTIRALEAN ORIORA IRTEERA EGIN GENUEN HAUR HEZKUNTZAKO 3 ETA 5 URTEKO HAURREKIN BATERA. EZIN HOBETO PASATU GENUEN!

GOIZEAN AUTOBUSEZ ABIATU GINEN, ETA ORAINDIK PARKERA IRITSI GABE GINELA, HAMAIKETAKOA EGITEKO GELDIALDIA EGIN GENUEN. HAN, EZUSTEKO POLIT BAT IZAN GENUEN: ANIMALIA BATZUK INGURUAN ZEBILTZAN. BEGIRADA JAKIN-MINEZ ETA URDURITASUN PITTIN BATEKIN JAN GENUEN HAMAIKETAKOA… 🥪

ONDOREN, HONDARTZAKO PARKERA JOAN GINEN ETA HAN JOLASEAN ARITU GINEN GOGOZ. PARKETIK ITSASOA IKUSTEN ZEN, ETA HORREK JOLAS-GIROARI UKITU MAGIKOA EMAN ZION. ALDE BATETIK BESTERA, ENERGIAZ BETETA IBILI GINEN!

BAZKALDU ETA GERO, ATSEDEN HARTUTA ETA BIHOTZA POZIK, ESKOLARA ITZULI GINEN. ETA ZER GERTATU ZEN ETXEAN? BA, FAMILIA ASKOK GALDERA BERA EGIN ZUTELA:
“ZERGATIK DAGO HONDARRA ETXEKO PASILLOAN?” 🤔

ERANTZUNA ARGIA DA: HONDARTZAK GUREKIN BIDAIATU NAHI IZAN ZUEN, ETA HORREGATIK SARTU ZEN OINETAKOETAN, GALTZETAN… ETA AGIAN MOTXILAKO TXOKOAN ERE BAI! 

EGUN ZORAGARRI BAT IZAN ZEN: AIRE LIBREAN, LAGUN ARTEAN ETA NATURAZ GOZATUZ.

 

ORIOKO BIDEOA

 

APIRILEAN LIBURUAREN ASTEA OSPATU DUGU, ETA HAUR HEZKUNTZAKO 4 URTEKO GELAN OSPAKIZUN HORI HILABETE OSORA LUZATZEA ERABAKI DUGU. IZAN ERE, LIBURUAK EGUN BATEZ EDO ASTE BATEZ OSPATZEKOAK BAINO ASKOZ GEHIAGO DIRA: EGUNEROKO BIDELAGUNAK, AMETSEN SUSTATZAILEAK ETA IKASKUNTZA PROZESUAREN OINARRI SENDOA.

HAURREI TXIKITATIK IRAKURTZEA FUNTSEZKOA DA: HIZKUNTZA ABERASTEN LAGUNTZEN DU, IMAJINAZIOA PIZTEN, EMOZIOAK ADIERAZTEN ETA ENTZUTE AKTIBOA GARATZEN. BAINA BATEZ ERE, IPUIN BATEK HAURRARI MUNDUA ULERTZEKO BESTE MODU BAT EMATEN DIO. HITZ BAKOITZAK, IRUDI BAKOITZAK, HAURRAREN BARRUAN ZERBAIT MUGIARAZTEN DU.

HILABETE HONETAN ZEHAR, FAMILIAREN PARTE-HARTZEA OSO BEREZIA IZAN DA. HAINBAT SENIDE ETORRI DIRA IPUINAK KONTATZERA ETA HAURREKIN PARTEKATZERA. MILA ESKER ZUEN DENBORAGATIK, MAITASUNAGATIK ETA KONPLIZITATEAGATIK! HAURRAK POZ-POZIK EGON IZAN DIRA ZUEI ENTZUTEN.

ETA EZ DA HOR BUKATU: GELAKIDEEN ANAIA-ARREBAK ERE IZAN DITUGU GUREAN IPUIN KONTALARI LANETAN. GURETZAT OSO UNE BEREZIAK DIRA HORIEK — AURPEGIETAN IRRIBARRAK, BEGIETAN DISTIRA.

HORREN GUZTIAREN ONDORIOZ, GU ERE ANIMATU GARA IPUINAK AHOZ KONTATZERA. ENTZUTEN IKASI ONDOREN, ORAIN KONTATZEN IKASTEKO GARAIA IRITSI DA: ISTORIO BAT NOLA ANTOLATU, NOLA ADIERAZI, NOLA PASIOZ KONTATU… GURE LEHENENGO URRATSAK EMATEN ARI GARA!

 

 

 

AURREKO ASTEAN, IPUIN MAGIKO BATEK INSPIRATU GINTUEN: “KATTA ARTEZALEAK”, GURASO BATEK KONTAUTAKO ISTORIO ZORAGARRI BAT. IPUINAK ARTEAREN INDARRA ETA SORMENAREN GARRANTZIA AZPIMARRATZEN DITU, ETA HAURREN IRUDIMENA PIZTU ZUTEN BEREHALA.

ENTZUN ONDOREN, GURE BURUA ERRONKAN JARRI GENUEN: GU ERE ARTISTA BIHURTUKO GARA! ETA EZ EDONOLA… ARTE-LAN ERRALDOI BAT SORTZEA IZAN ZEN GURE HELBURUA. HORRETARAKO, EZ GENITUEN PINTZELAK EDO KOLORETAKO ARKATZAK ERABILI —EZ HORIXE!— ESKUAK IZAN ZIREN GURE LANABES NAGUSIAK.

HAUR BAKOITZAK BERE UKITU PERTSONALA EMAN ZION MURAL KOLORETSUARI. KOLOREZ BETETAKO ESKU-HATZEKIN, HORMA HANDI BATEAN AZTARNAK UTZI ZITUZTEN, ELKARREKIN LAN EGINEZ, ELKAR ENTZUNEZ ETA, BATEZ ERE, SORMENA ASKATUZ.

EMAITZA? IKUSTEKOA DA: KOLOREZ BETERIKO MURAL ERRALDOI BAT, HAUR BAKOITZAREN NORTASUNA ISLATZEN DUENA ETA TALDE-LANAREN INDARRA AGERIAN UZTEN DUENA.

 

AZKEN ASTEOTAN BURU-BELARRI MURGILDUTA EGON GARA BALEAREN INGURUKO PROIEKTUAN. HAURREK JAKIN-MIN HANDIA ERAKUTSI DUTE HASIERATIK, ETA ELKARREKIN LAN EGINEZ, GALDERA ASKO SORTU ETA ERANTZUNAK BILATZEN ARITU GARA.

🎥 BUKATZEKO, PROIEKTUAREN LABURPENA BIDEO BATEAN JASO DUGU, ETA HAURREK BERTAN AZALDU DUTE ZER IKASI DUTEN BERAIEN HITZEZ ETA ILUSIOZ. GURE HELBURUA EZ DA BAKARRIK EZAGUTZA TRANSMITITZEA, BAIZIK ETA JAKIN-MINA PIZTEA, INFORMAZIOA BILATZEKO GOGOA SUSTATZEA ETA TALDE-LANEAN GOZATZEKO AUKERA EMATEA.

ESKERRIK ASKO GURASO GUZTIEI ZUEN LAGUNTZA ETA MOTIBAZIOAGATIK.

GOZATU BIDEOAZ, HAURREK EGINDAKO LANAZ HARRO EGOTEKO MODUKOA DA ETA!

BALEA BIDEOA